綾波麗與我

      2013年的5月，說起eva 新世紀福音戰士的Q上映 , 回想起我一段青蔥歲月發生的往事。
有個動漫迷（一般高登仔叫佢呢type做毒x）朋友好鐘意eva，情迷綾波麗，當時認識佢原故是大家都上photoshop同ai堂。重點是住得近，人又內向又檢點，有次下堂後上佢屋企，家設簡潔，最著眼就得一幢玻璃櫃，全部都係動漫figure，有幾層放左綾波麗，明日香，之後都係....綾波麗綾波麗綾波麗。。。仲有一個叫咩涼官既女仔，好啦。綾波麗既肉體都係佢令我開眼界。當時show給我時大家都有d怕醜。
      我性格係好鐘意搵陪腳，但無女仔會陪我，因為佢同我喜好夠夾(毒？)佢生命中得呀媽外，就係三個朋友。但都係正常年青人，無不良嗜好。咁我又無拖拍，佢成個樣又乖仔又好人咁又住得近，當然係一流的陪腳之選。往後個一年都係咁，上佢屋企睇低能野好笑野，一齊玩高達game,(陪佢玩)當年我二十一歲左右，咁就笑一日，睇套片咁就一日。

       呢段時期維持左係一年有三個月多，放工上佢屋企玩，真正清純過蒸漏水咩都無做，兩少無猜咁。

        就係咁果時，十一月尾，前男友搵番我，我地又一齊番，又同佢拍番拖。而我又鐘意影相，影左個合照~~~

        有一日我又如常地無野做又去佢屋企，無講自己搵番前男友，當時有諗過講，但一想到講左佢應該會唔開心，所以我地又如常地玩。果晚就兩個人又玩photoshop...記得果時，又開番隻碟睇--福音戰士新劇場版：序。當時一路睇一路聽佢解說。所以認真想講呢套劇係需要再睇再睇的，因為拍得耐幾年一次真係唔記得劇情。到10點左右，離開佢屋企，番到自已屋企時我就發現漏左部相機0係佢屋企。（呢個咁老土既劇情係真係發生係我身上）咁果時我就話聽日，約0係旺角等食個飯加交收相機啦。

       到左第2日放工時間（記得果時係好熱既十二月）食完飯都夜晚8點但成程佢都怪怪的。那時天好藍。果時佢比部相機我，同我講，佢睇晒入面d野。我個背涼一涼。我感覺到我好似會失去呢位朋友。之後我同佢話別後各自回家時，SMS佢話自己有男朋友。佢問我係幾時既事，我話呢兩個星期。後來係寫左幾句野同我say goodbye...果時我無意會唔到佢會咁決絕，以為過多幾日搵番佢會無事。果時係佢facebook wall留言：please forgive me...佢facebook friend list只得我一個。

       後來佢都無搵過我，直頭消失左一樣。果時我先發現，呢一type男仔玩消失你係真係搵佢唔到。

       果時我唔開心，當然後期先知佢原來鐘意我，果時我真係好遲好鈍好賤格。

       但因為我好明白佢既習性，住係私樓既佢，經常流連樓下大型商場，有一日我一個人時同樣在此商場閒遊時，見到佢迎面而來，同3個毒撚fd邊行邊玩。佢仰高頭扮睇樓上，十分刻意。為免佢尷尬我又扮睇佢唔到。

就係咁，我個心都有呯呯緊張咁跳，我深信佢都係咁。

到今日同男朋友等，再講番eva既故事時，感覺好深，深到回到過去。回到當時既我地。

老老實實，當年我無當佢係兵，係真正既朋友，互相尊重，談笑同交流喜好。

幾年後諗番，當時佢對我不但只係朋友，我當時以為包容係呀妹果種，到今日先明白，還有一點點愛情。



﹣﹣﹣﹣﹣﹣﹣﹣﹣﹣﹣

過多幾日，我慢慢回想呢個男孩說話神態和表情，都好卡通又友善。我最記得佢鐘意紅色Mary Jane款鞋，當年都未興。我一直都以為佢喜歡小紅帽。因此原故當時我都購置了一對啡色MaryJane.當年買唔到紅色啦。
還有他曾經很黑仔，見過人於眼前跳樓。朋友都問，有無可惜無開始？   回憶有距離會更覺得美好 ，都話，係好朋友啦。